ఐదేళ్ల వయస్సులో గర్భం, లినా మెడినా.. ప్రపంచంలోనే అతి చిన్న ‘తల్లి’

ఆమె పేరు లీనా మెడినా. ఆమెకు ఐదేళ్ల వయస్సు ఉన్నప్పుడు పొట్ట పెరగడం మొదలైంది. దీంతో ఆమె తల్లిదండ్రులు.. కడుపులో కణితి ఉందని అనుమానించారు. వైద్యపరీక్షల తర్వాత అది కణితి కాదు.. గర్భం అని తెలిసి ఆశ్చర్యపోయారు. అప్పటికే ఆమె ఏడు నెలల గర్భంతో ఉందని వైద్యులు తెలిపారు.

సరిగ్గా ఇదే రోజు.. 1939, మే 14న లీనా పండంటి మగ బిడ్డకు జన్మనిచ్చింది. ఆమె చాలా చిన్న పిల్ల కావడం వల్ల వైద్యులు సిజరియన్ ద్వారా బిడ్డను బయటకు తీశారు. లీనా 1933లో పెరులోని అండేస్‌ అనే చిన్న గ్రామంలో పుట్టింది. లీనా కుమారుడి పేరు గెరార్డో.. ఇద్దరికీ వయస్సులో పెద్ద తేడా లేకపోవడంతో కలిసే ఆడుకొనేవారు.

అయితే, లీనాకు మూడేళ్ల వయస్సు నుంచే రుతుస్రావం జరిగేదని ఆమె తల్లి పేర్కొంది. అది గుర్తించిన కొద్ది నెలల్లో లీనా గర్భం దాల్చింది. ఐదేళ్ల చిన్నారి బిడ్డకు జన్మనివ్వడం అసాధ్యమని, ఆ సమయంలో అందుకు అవసరమైన అవయవాలు కూడా సక్రమంగా ఎదిగి ఉండవని కొందరు వైద్యులు వాదించారు. అయితే, ఈ ఘటన తర్వాత లీనా గానీ, ఆమె కుటుంబ సభ్యులుగానీ ఎవరూ స్పందించలేదు.

తండ్రి ఎవరు?: లీనాను గర్భవతి చేసిన వ్యక్తి ఎవరు అనేది సస్పెన్స్‌గా మిగిలింది. పోలీసులు అనుమానంతో ఆమె తండ్రిని అరెస్టు చేశారు. అయితే, సాక్ష్యాలు లేకపోవడంతో అతన్ని విడుదల చేశారు. దీంతో ఆమె గర్భానికి తండ్రే కారణమా మరేమైనా కారణాలు ఉన్నాయా? అనే సందేహాలు నెలకొన్నాయి. ఇప్పటికీ ఆ విషయం అంతుచిక్కని మిస్టరీయే.

40 ఏళ్లకే మరణించిన కొడుకు: లీనా కొడుకు గెరార్డో 1979లో 40 ఏళ్ల వయస్సులో ఎముకల సంబంధిత వ్యాధితో చనిపోయాడు. లీనా ఇప్పటికే జీవించే ఉంది. ప్రస్తుతం ఆమె వయస్సు 85 ఏళ్లు. లిమాలోని ఓ ప్రాంతంలో ఆమె నివసిస్తోంది. లీనా 1970 రౌల్ జరడో అనే వ్యక్తిని పెళ్లాడి మరో బిడ్డకు జన్మనిచ్చింది. ఇటీవల ఓ ప్రముఖ వార్తా సంస్థ ఆమెను ఇంటర్వ్యూ చేయడానికి ఆమెను సంప్రదించింది. ఇందుకు ఆమె అంగీకరించలేదు. అప్పుడే కాదు.. ఈ విషయం ప్రపంచానికి తెలిసిన రోజు నుంచి ఎన్నో వార్తా సంస్థలు ఆమెతో మాట్లాడేందుకు ప్రయత్నించి విఫలమయ్యాయి. ఈ నేపథ్యంలో ఐదేళ్ల వయస్సులోనే ఆమె గర్భం ఎలా దాచిందనే విషయం ఇప్పటికీ మిస్టరీగానే మిగిలిపోయింది.

ఎలా సాధ్యం?: సాధారణంగా యవ్వనంలోనే గర్భం దాల్చే అవకాశాలు ఎక్కువగా ఉంటాయి. వైద్యులు తెలిపిన వివరాల ప్రకారం అమ్మాయిలకు 11 ఏళ్లు, అబ్బాయిలకు 12 ఏళ్ల వయస్సు వచ్చిన తర్వాతనే మార్పులు వస్తాయి. 8 నుంచి 9 ఏళ్ల వయస్సులో అలాంటి మార్పులు ఏర్పడితే అనారోగ్య యుక్తవయస్సు (Precocious puberty) అని అంటారు. కొన్ని కేసుల్లో హార్మోన్ డిజార్డర్ వల్ల కూడా శరీర ఎదుగదలలో మార్పులు రావచ్చు. కానీ, లీనా ఐదేళ్ల వయస్సులో గర్భవతి ఎలాగైందనేది అంతు చిక్కడం లేదు. దీంతో ప్రపంచంలో అత్యంత చిన్న వయస్సులోనే తల్లైన రికార్డు లీనా పేరు మీదే ఉంది.

Leave a Reply

Your e-mail address will not be published. Required fields are marked *